No dumteng naulimek a panawen
Kasla maal-alingagko dagidi in-inut,
Pumigpigsa, umas-asideg nga arimpadek
Isuda't mangiparangarang isasangbay manen
Nalimed nga aramid nga inta inulit-ulit.
Di nanumo a kalapaw iti sakaanan ti turod
Ken pungto ti kapagayan
Isu't nagserbi a paraiso ta
Tunggal dumteng ti panawen
A di magawidan ti pannakaadipen
Nabileg unay a rugso.
Ti palayupoy ti angin nalamiis
Ngem di makaanay a mangsebseb
Bara’t bagita nga agrinrinnisiris
Dagiti alutiit mabainda, aglingedda
Dagiti kundidit ti ikkisda pumigpigsa
Dagiti billit-tuleng agintutulengda
Ta dida kayat a mangeg
Makatitileng a ritmo ti ranitrit.
