Kasano a Naasawak ni Baketko!!!???

Iti edadko itan a 70, kanayonko pay laeng a malaglagip dagidi kasta unay a linalaglag nga aramidko idi agar-aremak pay la ken baketko. Adda ngata aminen kaniak ti kinasutil. Daytoy met ti makaigapu ti namin-adu a nakaibabainak. Ayna ta kasla diak mamati a naasawak ni baketko ita!

Sangapulo ngatan ti tawenko idi ta mangrugin ti kinapilyok. Iti nailet a baetan nga awan pulos ti pagnaan dagiti ubbing a mapan idiay eskuwela isu ti gustok a pangur-urayan kadakuada. Lalaki man wenno babai, awan ti makalasat no diak apirasen ti mabagbagida. Addanto agik-ikkis, addanto met tay kasta unay ti rurodna, adda met tay manggandat a tumaray ngem awan a pulos ti makalibas. Diak ammo ta magustuak la unay ti mangsutsutil kadakuada. Daytoy met ti makaigapu ti pangmalmaloan daydi tatangko kaniak. Ngem talagan sa a natangken ti ulok ta uray mamalmaloak ket aramidek to manen ti madi nga inaramidko.

No dadduma, mangalaak iti samrid nga igges ket isu ti pangbutbutengko kadakuada. Adda pay tay agurgurigor ti butengna. Didak ngamin magawayan ta siak ti kapigsaanmi nga ubbing idi.

Naidakdakkelko dayta a kinasutilko. Idi damok ti maisagpat nga SK (YCAP kunada idi) ket nasutilak latta. Adda naminsan a panag-YCAP mi (napankam nagani a sanga bunggoy) ket idi ta madanon ti panagmeryenda, intugawko a nakakayang idiay sango ti sanga palanggana a suman a meryendaenmi. Inrantak daytoy ta kayatko a siak ti agiyawat iti tunggal mangan iti sangka-ilgat a suman, nangnangruna kadagiti medyo ub-ubbing met a padak. Medyo aprosak ngamin ti imada no mangalada ti kanenda. Tunggal adda umay mangala iti kanenna agkatkatawa. “Ne apay ngata nga agkatkatawada,” nakunkunak. No dagitay babbai, agikkis da pay! Nagbalawak. Kitaek iti sangoanak ket butbot met gayam toy inabel a sapinko! Ayna ket agrungrungarong met gayamen! Saan pay ngamin nga uso ti brief idi. Numona ket saan pay a natagbat diay lalatna! Nakamisuot pay laeng! Ayna apo ta kasta unay a bainko iti dayta a napasamak! Gapu iti daytoy, diakon napnapan pay kadagiti simmaruno a pang-YCAP mi agingga a diak natuli ta kanayondak met ngaminen nga awagan ti kakok! (Kakok ket maysa a klase ti tumaytaytayab a no aguni ket kasla “Tsupot! Tsupot! Tsupot!” kunana).

Sangapulo ket innem ti tawenkon idi ta mangrugiak metten nga agarem iti balasang. Ngem uray kasano ti kinasutilko ket kasta met ti kinamemmemko no balasang ti pagsasaritaan. Mabutengak a mangipudno ti ayatko iti maysa a balasang! Torpeak ti katotorpean!

Ni Lucring ti immuna ken maudi a nakursunadaak. Kanayonak a mapan lumablabas iti minalem idiay balayda. Sumrekak koma ta innak pasyaren ngem mabainak. Iti naminsan a sumipnget, kuntodo arwat ti namayak ta kinunak iti bagik a pasyarek ni Lucring ket ibagak iti sangon-sango ti pudno a kaririknak. Nagsisiimak pay laeng sakbay koma a sumrekak iti balayda. Nagpaigidak iti asideg ti bansagda. Kunam pay, bigla a napan ni Lucring iti bansag ket igge-iggemna tay bote ti gin nga adda pabelo na ta isu idi ti uso a pagsilaw. Sabali met ti napanunotkon. “Sukitek la ketdi babaen iti tammudok!” Nakunkunak. Insaganak ngarud ti imak iti baet dagiti basar ti kawayan a bansagda. Iti panangyasidegko ti imak, nagranitrit ti kawayan a napaddakanna ket naipit ti imak. Agikkisak koma idi ta nakasaksakit ngem mabukingak nukuan isu a diak lattan nagtagtagari. Amano met a nagarubos ti isbuna ket sinurotna ti imak agingga iti kilikilik! Apaunay ket nga angsegnan!

Kabigatanna, limtegen ti tammudok. Kuna ni tatang nga isbuak kano ta isu ti agasna. Ngem nabirbnirtud kano no isbu ti babai! Kunam pay sabali man ti napanunotkon. Inabangak manen ni Lucring iti bansagda iti sumaruno a sumipnget. Awan pay ngata lima a minutos, addaytan ni Lucring. Umayen umisbo. Insaganak ngarud ti tammudok tapno maagasan daras. Ngem sakbay nga agtugaw ni Lucring, bigla a rimmuar tay asoda a kaan-anak. Kinirabna ti patongko. Nabriat a naminpinsan ti pantalonko. Numona ket isu pay met ngarud tay kababaroan a pantalonko. Dakkel pay ti sugat toy patongko ta kasta unay ti panangiweswes tay asoda!

“Ana ngamin obram dita sirok ti bansag?” Kinuna ni tatang ni Lucring a di mo maawatan no makapungtot wenno makakatkatawa ta napigsa ti bosesna ngem nakaisem met.

“A-awan, tata. Nanglintegak lang ngamin ti pagnaak. Sige, agawidakon.”

“Agurayka, barok ta sumaenta dayta kinagat ti aso.” Kinuna ni tatang ni Lucring. Mannuma ngamin isuna.

“Saanen, tata. Kababain met.”

“Ana a kababain. Umayka ketdin ket baka ririennakto ni amam no diak agasan.”

Kunam pay, pinagpaklebnak iti kawayan a kama sana medyo inbaba ti pantalonko. Kasta unay ti ayek-ek ni Lucring. Ammok lattan a daytoy nangisit a patongko ti ay-ayekekan na. Ayna kasta unay a bainko.

Nabayag a diak napnapan inda Lucring ta mabainak unay iti napasamak. No masabatko ni Lucring, iyadayok ti panagkitak ta kanayon a bangbangir ti isemna no kasta nga agsabat kami.

Lima ngatan a bulan ti napalabas. Diak latta mailiwliwag ti ayatko ken Lucring. Tunggal rabii a malaglagipko isuna. Malaglagipko pay diay nakitak iti kawayan a bansagda. Ayna ket sabsabali ti ob-obraek no kasta nga agmaymaysaak.

Inkeddengko iti bagik nga ipudnokon ti panagayatko ken Lucring. Napanak nagpasyar balayda iti maysa a rabii. Pinastreknak met. Adu nga istorya. Malaglagipna di napasamak idi kaniak ket ad-adda metten a diak mairugi ti kayatko nga ibaga kenkuana. Kunkunana pay ketdi a no kano armen diay kaarrubami a naguapo ket sungbatan na kano. Dina kano kayat tay napugot ken leppap ti agongna! Dina met ketdi inderetso a dinak kayat. Ngem kasla siak ti puntirya dagiti balikasna. Kunam pay awanen a pulos ti naibagak.

Nabayag manen a diak napnapan nagpasyar idiay balayda Lucring. Ammo ni tatang a kursonadak unay ni Lucring ket ibagbagana nga innak kano pasyaren amangan no itaray tay guapo a karrubami. Mapmapan kano ngamin agpaspasyar kenkuana.

Inyinumak ngarud iti dua taog a basi sakbay a napanak nagpasyar iti sumaruno a rabii. Kunam pay, apagdanonko, inbagakon nga ay-ayatek ket kayatko nga isu ti agbalin nga ina dagiti annakkonto! Kas ket la naltotan iti nangegnan!

“Awan pulos ti sumgar a dutdotko kenka! Adda pay ketdin nobyok, isu a dikanton umay agpaspasyar pay ditoy!”

Kaslaak la nadigos a piyek iti nangegko. Nagar-arudokakon a nagawid.

Makatawenen ti napalabas ngem diak latta nailiwliwag ni Lucring. Uray kanayonnak a bastosen ket ay-ayatek latta. Gapu ta agasideg laeng ti balaymi, mamin-adu a sisiimek ni Lucring. Ngem diakon makitkita pay no mapan umisbo ta nabalbaliwanen diay bansagda. Addan banyoda ngem awan pay ti atepna.

Gapu ta adda dakkel a kaimito iti ngatoen ti banyoda, immuliak ta kayatko a siripen ni Lucring no agdigos. Ayna apo ta nagpintas ket ti pammaginan. Makagkagatko pay ket ti dilak no kasta a makitkitak. Masansan dayta nga ar-araidek.

Naminsan manen a bigat a napan nagdigos ni Lucring, dinarasko met ti immuli iti kaimito. Ayna ta nakapinpintas a talaga ni Lucring. Nakalinlinis ti kudilna. Gapu iti dayta, diak met nagawidan ti riknakon. Sinolokon iti rawis ti kaimito. Iti di mabayag, bigla lattan a narpak ti kaimito. Naipisokak iti banyo a nakababa ti sapinko ken nakatangad ni Juniorko! Kasta unay nga ikkis ni Lucring. Ket daytan immayen ni tatang na a nakaiggem iti balladaw a buneng.

“Ana ti ar-aramidem iti anakko. Nagawan ket a bainmon? Mangreypka a bigbigat! No dimo itakder ta dayaw ta anakko, dikan makaawid a sibibiag!” Kinuna ni tatang ni Lucring.

Diak nakauni ket nagtungtung-edak lattan. Kasta met unay a riri ni Lucring ngem inpapailit ni tatang na nga agkasarkami iti kabiitan a panawen. Apaunay ket ti buenaskon iti daytoy a napasamak. Ana pay no di nagkasarkamin ngem nabayag a di insuko ni Lucring ti banderana kaniak. Nupay kasta naurayko met laeng ket ne piton ti annakmi. Ita medyo likudakon ti langit ngem nalailo pay la ti maysa ken maysa kadakami ken Lucring!