Ubbing ta pay
Ngem nabukelen
Ditoy pusok
Naidumdumaka.
Iti naminsan kinunak
Nga ay-ayatenka
Ngem immisemka
Timmarengtengka.
Naminsan manen
Nagsarakta
Kinunak manen
Nga ay-ayatenka.
Ti sungbatmo:
“Ladingitek
Sumapulka’t sabali
A mangay-ayat met kenka.”
Iti apagkanito
Nagsina dagiti dalanta
Nagsagabaak liday
Ta dikan makita.
Iti sekundarya
Nagtumpong manen
Dagiti dalanta
Timmingra toy rikna.
Linaglagipta
Di kinaubingta
Adu nga isem
Adu a katawa.
Iti di mabayag
Nagsabat riknata
Ayan-ayatta
Sinangalta.
Iti kolehiyo nagsina manen
Dagiti dalanta
Inayatka latta
Ngem nagduduaka.
Kinunam: “Ladingitek
Sumapulkan ‘ti sabali
A mangipateg
Mangay-ayat kenka.”
Binukodak ti liday
Nagsagabaak
Naganusak
Intalimengka ditoy pusok.
Kalpasan ti kolehiyo
Nagtumpong manen
Dagiti dalanta
Nagkatrabahoanta.
Nagsabat manen
Nagsina a riknata
Di ayat a napukaw
Naisublida, rimmangpaya.
Tapno saanen
Nga agsina pay
Dagiti dalanta
Natinong ti kallaysa.
Naglantip dagiti bibig
Puso ken kararuata
Di mailadawan
Naidumduma a ragsak.
Kalpasan ti kallaysa
Ti hotel tinurongta
Puraw a kotse
Ti naglugananta.
Diak mailadawan ti riknak
Kasta met kenka
Naginnadayo
Dagiti imatangta.
Nagulimekak
Nagulimekka
Iti apagapaman
Naburak dayta.
Kas kapardas
Iti kimat
Ti naglugananta
Nadesgrasya.
Minatmatanka
Ta bagim
Linapunos
Bukodmo a dara.
Iti saggaysa a balikas, kinunam:
“Sumapulkan to ti sabali
Diak nairanta
A para kenka.”
No comments:
Post a Comment