Kas man inyar-arasaas ti angin
Bayat pinangdalaposna 'toy pingping
A nangamoy ditoy arinkuloten
Atiddog a buok ket sika iti talyawek
Wen, naimatangak dayta anniniwan
Iti malikudan iti kabus a bulan
Induronnaka nga umay ditoy sidong
Inpal-it ipos ti allawig a dimmanon
Dimmagaska iti kanito a panagmaymaysak
Agep ti nalamiis nga angin iti nariknak
Naidennes ditoy bimmangkay a bibig
Nga intabon iti kinaliday ket nagungarak
Indiayam dagita imam ket binataknak
Iti apros a nangbibineg nangted pigsa
I'toy marmarpuog a barukong addan ragsak
A sinangpetan maililiwan a kaayan-ayat
No comments:
Post a Comment