Inliyadko ti bagik
Iti nalukneng ken nalamuyot a sofa
Tapno ipamaysak a denggen
Panagtokamo iti piano
Nalamuyot, nasam-it a denggen
Kas nalamuyot a dapadap
Iti tunggal kuerdas toy pakabuklak
Tunggal nota kasla apros ditoy bagik
Mariknak ti panagkarayam ti lamiis
Ta sonatam iyagusnak
Iti yuyeng ni Paraiso.
Ti apros dagita nalamuyot a dakulapmo
Mariknak iti tunggal patit mo iti kuerdas.
Ta ayugmo ket isu ti bagim
Matmatak dagita matam
Ket mailadawak ti kaririknam
Awan sumngaw a balikas
Ngem dagiti lapayagko
Matitilengda iti ragsak.
Ta ritmo ti panagtokarmo
Kaarigna ti agdanggay
Agallo-allon a bagita
No napaspas ti kumpas
Pumigpigsa ti anangsab
No nain-inayad
Kasla mauram ti pakabuklak
Toy kararuak isu ti kantam
Toy bagik isu ti pianom
Apros dagita dakulapmo
Iyegda’t agnanayon a pannakaadipenko
Tunggal kanito nga ipatayabmo
Makapaseggar, makabibineg a sonata
Toy nalailo a piano!
Published at Bannawag
July 4, 2011
No comments:
Post a Comment